Thursday, April 9, 2009

ਗ਼ਜ਼ਲ

ਜੰਗਲੀ ਬੂਟੇ ਡਰੇ-ਡਰੇ ਨੇ, ਉਸ ਦਿਨ ਦੀ ਬਾਰਿਸ਼ ਤੋਂ ਬਾਅਦ।

ਖੇਤ ਜਾਪਦੇ ਹਰੇ-ਭਰੇ ਨੇ, ਉਸ ਦਿਨ ਦੀ ਬਾਰਿਸ਼ ਤੋਂ ਬਾਅਦ।

----

ਗਾਈਆਂ ਦਾ ਵੱਗ ਲਗਦੈ ਜੀਕਣ, ਮੁੜ ਏਧਰ ਦੀ ਹੈ ਲੰਘਿਆ,

ਵੱਟਾਂ,ਬੰਨੇ ਚਰੇ-ਚਰੇ ਨੇ, ਉਸ ਦਿਨ ਦੀ ਬਾਰਿਸ਼ ਤੋਂ ਬਾਅਦ।

----

ਮਹਿਲਾਂ ਦੀ ਅੜਤਲ ਦੇ ਕਿੰਗਰੇ, ਨ੍ਹਾਤੇ-ਧੋਤੇ, ਨਿਖਰੇ-ਨਿਖਰੇ,

ਕੱਚ-ਬਨੇਰੇ ਡਰੇ-ਡਰੇ ਨੇ, ਉਸ ਦਿਨ ਦੀ ਬਾਰਿਸ਼ ਤੋਂ ਬਾਅਦ।

----

ਕੁਝ ਤਾਂ ਤਕੜੇ ਹੋ ਕੇ ਟੱਕਰੇ, ਐਪਰ ਕੁਝ ਨਦੀਆਂ ਦੇ ਕੰਢੇ,

ਖੁਰਨੋਂ ਪਹਿਲਾਂ ਖਰੇ-ਖਰੇ ਨੇ, ਉਸ ਦਿਨ ਦੀ ਬਾਰਿਸ਼ ਤੋਂ ਬਾਅਦ।

----

ਲਗਦਾ ਸੀ ਮਿਲ਼ਣੀ ਦੀ ਮਰਹਮ, ਲਗਦੇ ਹੀ ਇਹ ਸੁਕ ਜਾਵਣਗੇ,

ਜ਼ਖ਼ਮ ਦਿਲਾਂ ਦੇ ਹਰੇ-ਹਰੇ ਨੇ, ਉਸ ਦਿਨ ਦੀ ਬਾਰਿਸ਼ ਤੋਂ ਬਾਅਦ।

----

ਜੋ ਬਾਤਾਂ ਦੇ ਵਾਕ ਤੁਹਾਡੇ, ਮੂੰਹ ਚੋਂ ਲਾਰੇ ਬਣ-ਬਣ ਨਿਕਲ਼ੇ,

ਲਗਦੇ ਸਾਰੇ ਖਰੇ-ਖਰੇ ਨੇ, ਉਸ ਦਿਨ ਦੀ ਬਾਰਿਸ਼ ਤੋਂ ਬਾਅਦ।

----

ਬੋਲ਼ਿਆਂ ਵਾਂਗਰ ਕਰ ਤਾ ਬਾਦਲ, ਕੰਨਾਂ ਤਾਈਂ ਇਸ ਕਿਣ-ਮਿਣ ਨੇ,

ਬੋਲ ਅਸਾਡੇ ਮਰੇ-ਮਰੇ ਨੇ, ਉਸ ਦਿਨ ਦੀ ਬਾਰਿਸ਼ ਤੋਂ ਬਾਅਦ।

2 comments:

हरकीरत ' हीर' said...

ਜੰਗਲੀ ਬੂਟੇ ਡਰੇ-ਡਰੇ ਨੇ, ਉਸ ਦਿਨ ਦੀ ਬਾਰਿਸ਼ ਤੋਂ ਬਾਅਦ।
ਖੇਤ ਜਾਪਦੇ ਹਰੇ-ਭਰੇ ਨੇ, ਉਸ ਦਿਨ ਦੀ ਬਾਰਿਸ਼ ਤੋਂ ਬਾਅਦ।

ਵਾਹ ...ਵਾਹ....!!

----
ਗਾਈਆਂ ਦਾ ਵੱਗ ਲਗਦੈ ਜੀਕਣ, ਮੁੜ ਏਧਰ ਦੀ ਹੈ ਲੰਘਿਆ,
ਵੱਟਾਂ,ਬੰਨੇ ਚਰੇ-ਚਰੇ ਨੇ, ਉਸ ਦਿਨ ਦੀ ਬਾਰਿਸ਼ ਤੋਂ ਬਾਅਦ।

ਬਹੁਤ ਖੂਬ....ਬਾਦਲ ਜੀ ਬਹੁਤ ਵਧੀਆ ਲਿਖਦੇ ਹੋ ਤੁਸੀਂ ......!!

جسوندر سنگھ JASWINDER SINGH said...

AKHAR AKHAR NU PARNAAM HAI BADAL SAHIB
DIL NAHI KARDA IS BLOG TOn NAZAR HTAUN NU