Friday, August 20, 2010

ਅੱਖਾਂ ਸਾਂਭਣ ਕੀਕਣ ਸੁਪਨਾ ਟੁਕੜੇ-ਟੁਕੜੇ...

ਗ਼ਜ਼ਲ

ਅੱਖਾਂ ਸਾਂਭਣ ਕੀਕਣ ਸੁਪਨਾ ਟੁਕੜੇ-ਟੁਕੜੇ?

ਡਿੱਗੇ ਤੋਂ ਬਿਨ ਹੋਇਆ ਸ਼ੀਸ਼ਾ ਟੁਕੜੇ-ਟੁਕੜੇ?

-----

ਬਾਰੀ ਦਾ ਬਣ ਬੈਠਾ ਤੇ ਹਮਰਾਜ਼ ਰਿਹਾ ਨਾ,

ਕਰ ਸੁੱਟਿਆ ਮੈਂ ਸਾਰਾ ਪਰਦਾ ਟੁਕੜੇ-ਟੁਕੜੇ

-----

ਮਿੱਠੇ ਬੋਲਾਂ ਪੱਕੇ-ਪੀਢੇ ਜੋੜ ਲਗਾਏ,

ਕੌੜੇ ਬੋਲਾਂ ਕੀਤਾ ਬੰਦਾ ਟੁਕੜੇ-ਟੁਕੜੇ

-----

ਦਿਲ ਵੀ ਸ਼ੀਸ਼ਾ, ਸ਼ੀਸ਼ਾ ਵੀ ਦਿਲ, ਦੋਵੇਂ ਟੁਟਦੇ,

ਕੋਈ ਵੀ ਨਾ ਹੋ ਕੇ ਜੁੜਦਾ ਟੁਕੜੇ-ਟੁਕੜੇ

-----

ਰੋਜ਼ ਸ਼ਰਾਫ਼ਤ ਅਤੇ ਹਲੀਮੀ ਸਾਨੂੰ ਪਰਖ਼ੇ,

ਪੱਥਰ ਨੂੰ ਵੀ ਕਰ ਗਿਆ ਨਖ਼ਰਾ ਟੁਕੜੇ-ਟੁਕੜੇ?

-----

ਓਧਰ ਡਰ ਨੇ ਜਦ ਸਭ ਨੂੰ ਇਤਫ਼ਾਕ਼ ਬਖ਼ਸ਼ਿਆ,

ਹੋਇਆ ਏਧਰ ਝਟ-ਪਟ ਖ਼ਤਰਾ ਟੁਕੜੇ-ਟੁਕੜੇ?

-----

ਲੈ ਚੱਲੋ ਇਕ ਜੁਗਨੂੰ ਫੜ ਕੇ ਘਰ ਨੂੰ ਬਾਦਲ’,

ਕਰੀਏ ਫਿਰ ਤੋਂ ਗੂੜ੍ਹਾ-ਨ੍ਹੇਰਾ ਟੁਕੜੇ-ਟੁਕੜੇ?