ਅੰਞਾਣੇ ਵਿਚ ਗਿਰੀ ਝਾਂਜਰ ਨੂੰ ਐਂ ਛਣਕਾਰ ਨਾ ਥਾਂ-ਥਾਂ।
ਮੁਹੱਬਤ ਆਪ ਬੋਲੇਗੀ, ਇਨੂੰ ਪਰਚਾਰ ਨਾ ਥਾਂ-ਥਾਂ।
------
ਬਚੀਂ ਇਸਤੋ, ਡੁਬੋਏਗੀ ਤਿਰੀ ਇਹ ਅੰਧ-ਵਿਸ਼ਵਾਸੀ,
ਕਿ ਦੀਵੇ ਬਾਲ਼ ਕੇ ਕੱਚੇ ਘੜੇ ਤੇ ਤਾਰ ਨਾ ਥਾਂ-ਥਾਂ।
------
ਮੁਹੱਬਤ ਵਿਚ ਆਸ਼ਿਕ ਦੀ, ਇਹੋ ਜਿੱਤ ਹੁੰਦੀ ਹੈ,
ਖ਼ਬਰ ਰੱਖਣੀ, ਬਣੇ ਅਨਜਾਣ ਰਹਿਣਾ, ਹਾਰਨਾ ਥਾਂ-ਥਾਂ।
-------
ਚਮੇਲੀ ‘ਚੋਂ ਸਦਾ ਹੀ ਮਹਿਕ ਨਿਕਲ਼ੇਗੀ, ਨਾ ਤੂੰ ਅਜ਼ਮਾਅ,
ਮਿਰੇ ਦਿਲਬਰ! ਸੁਬਕ ਜੋਬਨ ‘ਤੇ ਛਮਕਾਂ ਮਾਰ ਨਾ ਥਾਂ-ਥਾਂ।
------
ਸਮੇਂ ਦਾ ਕੀ ਪਤਾ ਹੁੰਦੈ! ਕਦਮ ਤੇਰੇ ਹੀ ਪੈ ਜਾਵਣ,
ਨਾ ਪੁਟ ਰਸਤੇ ‘ਚ ਤੂੰ ਟੋਏ, ਵਿਛਾਅ ਐਂ ਖ਼ਾਰ ਨਾ ਥਾਂ-ਥਾਂ।
------
ਜੇ ਡੌਲ਼ੇ ਜ਼ੋਰ ਨਾ ਦਸਦੇ, ਹਵਾ ਕਦ ਮਿੱਤ ਹੋਣੀ ਸੀ,
ਕੀ ਪੈਣਾ ਮੁੱਲ ਸੀ ਜਿੱਤ ਦਾ, ਜੇ ਹੁੰਦੀ ਹਾਰ ਨਾ ਥਾਂ-ਥਾਂ।
------
ਬੜਾ ਹੈ ਨਰਮ-ਦਿਲ “ਬਾਦਲ”, ਬੜਾ ਨਿੱਘੈ ਸੁਭਾਅ ਦਾ ਇਹ,
ਜੇ ਉਲਫ਼ਤ ਨਾਲ਼ ਨਹੀਂ ਇਸਦੇ, ਤਾਂ ਇਉਂ ਫ਼ਿਟਕਾਰ ਨਾ ਥਾਂ-ਥਾਂ।
No comments:
Post a Comment