ਸੱਚ ਵਰਗਾ ਝੂਠ ਵਿਕਦਾ ਸਾਰੀਆਂ ਹੱਟਾਂ ‘ਤੇ ਹੈ।
ਖੇਤ ਦੇ ਵਿਚ ਕਾਂਗਿਆਰੀ ਪਰ ਕਣਕ ਵੱਟਾਂ ‘ਤੇ ਹੈ।
-------
ਸਿਰ ‘ਤੇ ਕਰਜ਼ਾ, ਖੇਤ ਸੁੱਕੇ, ਬੀਜ ਮਹਿੰਗੇ ਦੋਸਤੋ!
ਅੰਨ ਖਾਤਿਰ ਆਸ ਫਿਰ ਪੰਜਾਬ ਦੇ ਜੱਟਾਂ ‘ਤੇ ਹੈ।
------
ਰੰਗ ਪੀਲ਼ਾ-ਭੂਕ ਭਾਵੇਂ ਹੋ ਗਿਐ ਚਿਹਰੇ ਦਾ, ਪਰ
ਵੇਖ ਲਾਲੀ ਤੇਰੇ ਹੱਥੋਂ ਖਾਧੀਆਂ ਸੱਟਾਂ ‘ਤੇ ਹੈ।
------
ਫ਼ੋਮ ਦਾ ਵੀ ਹੈ ਸਰ੍ਹਾਣਾ, ਰੂੰ ਅਤੇ ਲੋਗੜ ਦਾ, ਪਰ
ਦੇਸ਼ ਦੇ ਕਾਮੇ ਦਾ ਸਿਰ ਇੱਟਾਂ ‘ਤੇ ਹੈ, ਵੱਟਾਂ ‘ਤੇ ਹੈ।
------
ਹੋਰ ਲਾ ਦਿਹ ਫ਼ੱਟ ਜ਼ਾਲਿਮ! ਜਾਂ ਇਨ੍ਹਾਂ ਨੂੰ ਛੇੜ ਦਿਹ,
ਆ ਰਿਹਾ ਅੰਗੂਰ ਮੇਰੇ ਪਹਿਲਿਆਂ ਫ਼ੱਟਾਂ ‘ਤੇ ਹੈ।
------
ਲੱਖ ਵਰਜੋ ਦੋਸਤੋ! ਹੈ ਪੀ ਹੀ ਲੈਣੀ ਓਸਨੇ,
ਅੱਖ ਜਿਸਦੀ ਨੈਣਾਂ ਵਿੱਚੋਂ ਡੁੱਲ੍ਹਦੇ ਮੱਟਾਂ ‘ਤੇ ਹੈ।
-------
ਪੀਂਘ ਝੁਟੀ ਸੀ ਕਿਸੇ ਨੇ ਢੇਰ ਚਿਰ ਪਹਿਲਾਂ, ਮਗਰ,
ਹੈ, ਦਬਾਅ ਹੱਥਾਂ ਦਾ ਹੁਣ ਤਕ ਲੱਜ ਦੇ ਵੱਟਾਂ ‘ਤੇ ਹੈ।
--------
ਰੂਹ ਚੁਰਾਕੇ ਇਕ ਹੁਸੀਨਾ ਹੋ ਗਈ ਹੈ ਲਾ-ਪਤਾ,
“ਬਾਦਲਾ”! ਪਰ ਅਕਸ ਉਸਦਾ ਦਿਲ ਦਿਆਂ ਫ਼ੱਟਾਂ ‘ਤੇ ਹੈ।
No comments:
Post a Comment