ਸ਼ੋਖ਼ੀਆਂ ਦੀ ਮੁਸਕਣੀ ਵਿਚ ਸਾਦਗੀ ਹੁੰਦੀ ਨਹੀਂ।
ਸਾਦਗੀ ਦੀ ਮੁਸਕਰਾਹਟ ਓਪਰੀ ਹੁੰਦੀ ਨਹੀਂ।
-----
ਹਿਰਨ ਵਾਂਗੂੰ ਚੁੰਗੀਆਂ ਭਰ ਕੇ ਨਾ ਐਂ ਹਲਕਾਨ ਹੋ,
ਹਰ ਚਮਕਦੀ ਚੀਜ਼ ਦੇ ਵਿਚ ਜ਼ਿੰਦਗੀ ਹੁੰਦੀ ਨਹੀਂ।
------
ਪਿਆਰ ਦੇ ਵਿਚ ਇਕ ਸਮਾਂ ਏਦਾਂ ਦਾ ਵੀ ਆਉਂਦਾ ਹੈ ਜਦ,
ਜ਼ਿੰਦਗੀ ਅਪਣੀ, ਵੀ ਆਪਣੇ ਆਪ ਦੀ ਹੁੰਦੀ ਨਹੀਂ।
-----
ਭੁੱਖਿਆਂ ਨੂੰ ਕੁਝ ਦਿਲਾਸਾ ਦੇ ਤਾਂ ਸਕਦੇ ਹੋ, ਹਜ਼ੂਰ!
ਪਰ ਉਦੋਂ ਤਕ, ਭੁੱਖ ਜਦ ਤਕ ਹਾਭੜੀ ਹੁੰਦੀ ਨਹੀਂ।
------
ਮੈਂ ਸਫ਼ਰ ਵਿਚ ਪਰਤਿਆ ਕੇ ਵੇਖਿਆ ਹੈ ਵਾਰ-ਵਾਰ,
ਕੰਡਿਆਂ ਬਿਨ ਤੋਰ ਮੇਰੀ ਤੇਜ਼ ਹੀ ਹੁੰਦੀ ਨਹੀਂ।
-----
ਕਰ ਲਿਆ ਕਰ “ਬਾਦਲਾ”! ਤੂੰ ਚੰਗੇ-ਮੰਦੇ ਦੀ ਪਛਾਣ,
ਹਰ ਧੜਕਦੀ ਹਿੱਕ ਦੇ ਵਿਚ ਦੋਸਤੀ ਹੁੰਦੀ ਨਹੀਂ।
No comments:
Post a Comment