ਗ਼ਜ਼ਲ

ਭੁੱਖ ਕੋਲ਼ੇ ਆਸ਼ਕੀ ਦਾ ਨਾਮ ਨਾ ਲੈ।
ਬੇ-ਵਜ੍ਹਾ ਹੀ ਸਿਰ-ਫਿਰੀ ਦਾ ਨਾਮ ਨਾ ਲੈ।
-------
ਜ਼ਿੰਦਗੀ ਜਿਸਨੇ ਬਣਾਈ ਨਰਕ ਸਾਡੀ,
ਉਸ ਦਹਾਕੇ, ਉਸ ਸਦੀ ਦਾ ਨਾਮ ਨਾ ਲੈ।
-------
ਉਮਰ ਸਾਰੀ ਮੌਤ ਥੀਂ ਜੋ ਜੂਝਿਆ ਹੈ।
ਓਸ ਕੋਲ਼ੇ ਜ਼ਿੰਦਗੀ ਦਾ ਨਾਮ ਨਾ ਲੈ।
-------
ਨੇਰ੍ਹ ਪਿੱਛੋਂ ਜੇ ਜਨਮ ਲੈਂਦਾ ਹੈ ਚਾਨਣ,
ਨੇਰ੍ਹ ਹੀ ਕਹਿ, ਰੌਸ਼ਨੀ ਦਾ ਨਾਮ ਨਾ ਲੈ।
-------
ਹੋ ਗਿਆ ਮੁਨਕਰ ਖ਼ੁਦਾ ਦੀ ਹੋਂਦ ਤੋਂ ਹੀ,
ਹੋਰ ਕਹਿ ਕੁਝ, ਬੰਦਗੀ ਦਾ ਨਾਮ ਨਾ ਲੈ।
-------
ਵੀਰ ਜੰਗਲ਼ ! ਆਦਮੀ ਤੋਂ ਕਿਉਂ ਦੁਖੀ ਹੋ?
ਰੋ ਕਿਹਾ ਉਸ,ਆਦਮੀ ਦਾ ਨਾਮ ਨਾ ਲੈ।
------
ਖਾ ਗਈ ਇਹ ਚੰਦਰੀ ਪਰਵਾਰ ਮੇਰਾ,
“ਬਾਦਲਾ”! ਮੁੜ-ਮੁੜ ਨਦੀ ਦਾ ਨਾਮ ਨਾ ਲੈ।