ਚੰਨ ਵਰਗੇ ਮੱਥੇ ਉੱਤੇ ਘੂਰੀਆਂ ਕਿਉਂ?
ਨੇੜਤਾ ਦੀ ਥਾਂ ਤੇ ਅੱਜਕਲ੍ਹ ਦੂਰੀਆਂ ਕਿਉਂ?
------
ਕਿਓਂ ਜ਼ੁਬਾਨ ਉੱਤੇ ਹੈ ਮਿਰਚਾਂ ਦਾ ਅਸਰ?
ਨਾਭੀਆਂ ’ਚੋਂ ਮੁੱਕੀਆਂ ਕਸਤੂਰੀਆਂ ਕਿਉਂ?
-------
ਜੇ ਨਹੀਂ ਸੀ ਕਿਸਮਤਾਂ ਵਿੱਚ ਦਰਜ ਹੀਰਾਂ,
ਰਾਂਝਿਆਂ ਨੇ ਚਾਰੀਆਂ ਫੇਰ ਬੂਰੀਆਂ ਕਿਉਂ?
-------
ਜੇ ਨਹੀਂ ਸੀ ਹੌਸਲੇ ਦਾ ਕੋਲ਼ ਪਾਣੀ,
ਫਿਰ ਖੁਆਈਆਂ ਲੁਕ-ਲੁਕਾ ਕੇ ਚੂਰੀਆਂ ਕਿਉਂ?
------
ਧੌਣ ਨੀਵੀਂ, ਹੱਥ ਜੋੜੇ, ਮੂੰਹ ‘ਚ ਹਾਂ ਜੀ,
ਮਿੱਠਿਆਂ ਸ਼ਬਦਾਂ ‘ਚ ਨੇ ਮਗ਼ਰੂਰੀਆਂ ਕਿਉਂ?
------
ਜਦ ਪਤਾ ਹੈ ਬਿਨ ਖ਼ੁਦਾ ਤੋਂ ਕੂੜ ਹੈ ਸਭ,
ਲੋੜਦੇ ਹਾਂ ਫੇਰ ਵੀ ਮਸ਼ਹੂਰੀਆਂ ਕਿਉਂ?
-----
“ਬਾਦਲਾ”! ਤੂੰ ਪੁੱਛ ਕੇ ਦੱਸੀ ਖ਼ੁਦਾ ਨੂੰ
ਮੇਰੇ ਹੀ ਕਰਮਾਂ ਦੇ ਵਿੱਚ ਮਜਬੂਰੀਆਂ ਕਿਉਂ?
No comments:
Post a Comment