ਗ਼ਜ਼ਲ

ਪਿਆਰ ਦਾ ਮੁਲ ਅਸਲ ਵਿਚ ਤਦ ਜਾਣ ਹੁੰਦੈ।
ਪਿਆਰ ਜਦ ਕਬਜ਼ਾ ਨਹੀਂ, ਪਹਿਚਾਣ ਹੁੰਦੈ।
------
ਜੋ ਦਿਸਣ ਨੂੰ ਤਾਂ ਬੜਾ ਸਿੱਧਾ ਦਿਸੇ, ਪਰ
ਸੋਚ ਦੇ ਵਿਚ ਸੌ ਤਰ੍ਹਾਂ ਦਾ ਕਾਣ ਹੁੰਦੈ।
-------
ਜੇ ਗ਼ਮਾਂ ਨੂੰ ਪਾਲ਼ੀਏ ਦਿਲ ਦੇ ਲਹੂ ਥੀਂ,
ਰੱਤ-ਪੀਣੇ ਹਿਜਰ ਨੂੰ ਤਦ ਮਾਣ ਹੁੰਦੈ।
------
ਪੀ ਕੇ ਹੰਝੂ, ਖਾ ਕੇ ਗ਼ਮ, ਤਿੜਿਆ ਫਿਰੇਂ ਤੂੰ,
ਇਹ ਵੀ ਕੋਈ ਪੀਣ ਹੁੰਦੈ, ਖਾਣ ਹੁੰਦੈ?
--------
ਧਰ ਲਿਆ ਜਾਂਦਾ ਹੈ ਮਨ ਤੇ ਭਾਰ ਤਦ ਤਕ,
ਧੌਂਖਣੀ ਦਿਲ ਦੀ ‘ਚ ਜਦ ਤਕ ਤਾਣ ਹੁੰਦੈ।
------
ਗੱਲ ਮੌਕੇ ਦੀ ਕਦੋਂ ਮੌਕੇ ‘ਤੇ ਅਹੁੜੇ?
ਵਕਤ ਤੋਂ ਪਹਿਲਾਂ ਕਦੋਂ ਕੁਝ ਠਾਣ ਹੁੰਦੈ।
------
“ਬਾਦਲਾ”! ਹੋਵੇ ਜਵਾਨੀ ਜਾਂ ਬੁਢਾਪਾ,
ਦਿਲ ਜਿਹੀ ਸ਼ੈਅ ਦਾ ਹਮੇਸ਼ਾ ਘਾਣ ਹੁੰਦੈ।