ਗੁਰਦਰਸ਼ਨ 'ਬਾਦਲ': ਇੱਕ ਵਿਛੋੜਾ ਹੀ ਨਹੀਂ...

ਖ਼ੁਸ਼ਆਮਦੀਦ !!

ਗ਼ਜ਼ਲਗੋ ਗੁਰਦਰਸ਼ਨ ਬਾਦਲ ਦੀ ਸਾਈਟ ਤੇ “ਜੀ ਆਇਆਂ ਨੂੰ !!”
“ਬਾਂਕਾ ਅਤੇ ਛਬੀਲਾ ਹੈ ਗੁਰਦਰਸ਼ਨ ਬਾਦਲ।
ਸੁਪਨਾ ਰੰਗ ਰੰਗੀਲਾ ਹੈ ਗੁਰਦਰਸ਼ਨ ਬਾਦਲ।
ਸ਼ਾਂਤ ਸੁਭਾ, ਪਰ ਟੱਕਰ ਲਵੇ ਪਹਾੜਾਂ ਨਾਲ਼,
ਬੰਦਾ ਵੈਸੇ ਘੀਲਾ ਹੈ ਗੁਰਦਰਸ਼ਨ ਬਾਦਲ।
ਮਾਰੂਥਲੀ ਜਹਾਜ਼ ਕਹੋ ਤਾਂ ਇਹ ਵੀ ਠੀਕ,
ਬੋਤੇ ਵਾਂਗ ਹਠੀਲਾ ਹੈ ਗੁਰਦਰਸ਼ਨ ਬਾਦਲ।”
“ਮਾਂ ਦੇ ਦੁੱਧ ਦਾ ਸਵਾਦ ਅਜੇ ਜੀਭ ਉੱਪਰ ਸੀ, ਜਦੋਂ ਪਹਿਲੀ ਕਵਿਤਾ ਦੇ ਬੋਲ ਫੁਰੇ। ਇੰਝ ਲੱਗਾ ਜਿਵੇਂ ਕਵਿਤਾ ਦੀ ਪਹਿਲੀ ਛੋਹ ਨਾਲ਼ ਹੀ ਰਾਤੋ-ਰਾਤ ਜੁਆਨ ਹੋ ਗਿਆ ਹੋਵਾਂ। ਕਵਿਤਾ ਦੇ ਹਰ ਰੂਪ ਤੇ ਹੱਥ ਅਜ਼ਮਾਇਆ ਹੈ ਪਰ ਅਖ਼ੀਰ ਗ਼ਜ਼ਲ ਨੇ ਮੈਂਨੂੰ ਆਪਣਾ ਸ਼ੈਦਾਈ ਬਣਾ ਲਿਆ।”
“ਚਿਰਾਂ ਦਾ ਮੈਂ ‘ਬਾਦਲ’ ਇਹੋ ਸੋਚਦਾ ਸਾਂ,
ਕਿ ਗ਼ਜ਼ਲਾਂ ਦਾ ਮੇਰਾ ਵੀ ਦੀਵਾਨ ਹੋਵੇ।”
15 ਜੂਨ, 1944 ਨੂੰ ਪਿਤਾ ਸ: ਸਰਦਾਰਾ ਸਿੰਘ ਤੇ ਮਾਤਾ ਸ਼੍ਰੀਮਤੀ ਪ੍ਰੀਤਮ ਕੌਰ ਦੇ ਘਰ ਜਨਮਿਆ ਗ਼ਜ਼ਲਗੋ ਗੁਰਦਰਸ਼ਨ ਬਾਦਲ, ਅੱਜਕੱਲ੍ਹ ਕੈਨੇਡਾ ਦੇ ਖ਼ੂਬਸੂਰਤ ਸ਼ਹਿਰ ਵੈਨਕੂਵਰ ‘ਚ ਧਰਮ ਪਤਨੀ ਸ਼੍ਰੀਮਤੀ ਮਨਜੀਤ ਕੌਰ, ਬੇਟੀ ਤਨਦੀਪ ਤਮੰਨਾ, ਬੇਟਾ ਕੰਵਲਜੀਤ, ਨੂੰਹ ਮਨਦੀਪ ਤੇ ਪਿਆਰੇ-ਪਿਆਰੇ ਪੋਤੇ-ਪੋਤੀਆਂ ਨਾਲ਼ ਵੱਸਦਾ ਹੈ।
ਉਸਦੀਆਂ ਹੁਣ ਤੱਕ ਛਪ ਚੁੱਕੀਆਂ ਕਿਤਾਬਾਂ ਹਨ:
ਕਿਤਾਬਾਂ: ਜੰਗੀ ਨਗ਼ਮੇ: (ਕਾਵਿ ਸੰਗ੍ਰਹਿ) 1965
ਗੰਦਲ਼ਾਂ: (ਗ਼ਜ਼ਲ ਸੰਗ੍ਰਹਿ) 1992
ਕਿਰਚਾਂ: (ਗ਼ਜ਼ਲ ਸੰਗ੍ਰਹਿ) 2000
ਵਿਓਹ ਮਿਟਾਉਂਦੇ ਗੀਤ: (ਗੀਤ ਸੰਗ੍ਰਹਿ) 2002
ਘਰ ‘ਚ ਕਲੇਸ਼ ਪੈ ਗਿਆ: (ਗੀਤ ਸੰਗ੍ਰਹਿ) 2003

ਇਸ ਤੋਂ ਇਲਾਵਾ ਕੋਈ ਪੰਜ ਕੁ ਕਿਤਾਬਾਂ ਦਾ ਖਰੜਾ ਤਿਆਰ ਪਿਆ ਹੈ। ਜਲਦੀ ਹੀ ਛਪ ਕੇ ਪਾਠਕਾਂ ਦੇ ਹੱਥਾਂ ‘ਚ ਆਉਂਣ ਦੀ ਆਸ ਹੈ। ਇਸ ਤੋਂ ਇਲਾਵਾ ਵੱਖ-ਵੱਖ ਸੰਪਾਦਿਤ ਗ਼ਜ਼ਲ-ਸੰਗ੍ਰਹਿ ਜਿਵੇਂ ਵਿਸ਼ਵ-- ਗ਼ਜ਼ਲ ਸੰਗ੍ਰਹਿ (ਡੈਨਮਾਰਕ), ਵਰ੍ਹੇ-ਵਾਰ ਸਾਹਿਤ (ਪਾਕਿਸਤਾਨ), ਗਗਨ ਦਮਾਮਾ ਬਾਜਿਓ (ਸਾਹਿਤ ਸਭਾ ਬਰਨਾਲ਼ਾ) ਤੇ ਕਈ ਹੋਰ ਕਿਤਾਬਾਂ ‘ਚ ਵੀ ਉਸਦੀਆਂ ਲਿਖਤਾਂ ਸ਼ਾਮਿਲ ਹਨ।
ਗ਼ਜ਼ਲ ਸੰਗ੍ਰਹਿ ਗੰਦਲਾਂ ਨੂੰ ਛਪਣ ਦੇ 3 ਮਹੀਨਿਆਂ ਦੇ ਅੰਦਰ-ਅੰਦਰ ਸਾਹਿਤ ਸਭਾ ਮੁੱਲਾਂਪੁਰ ਵੱਲੋਂ 1992 ‘ਚ ਐਵਾਰਡ ਦਿੱਤਾ ਗਿਆ। ਅਤੇ 1995 ਵਿੱਚ ਸਾਹਿਤ ਸਭਾ ਭਦੌੜ, ਬਰਨਾਲ਼ਾ ਵੱਲੋਂ ਸਾਲ਼ ਦੀਆਂ 7 ਬੇਹਤਰੀਨ ਕਿਤਾਬਾਂ ‘ਚ ਚੁਣਿਆ ਗਿਆ। ਰਾਈਟਰਜ਼ ਕਲੱਬ, ਲੁਧਿਆਣਾ ਅਤੇ ਸੂਲ਼-ਸੁਰਾਹੀ ਕੇਂਦਰ, ਚੰਡੀਗੜ੍ਹ ਵੱਲੋਂ 1996 ‘ਚ, ਸਿੱਖ ਵਿਰਸਾ ਮਾਸਿਕ ਮੈਗਜ਼ੀਨ ਕੈਲਗਰੀ, ਕੈਨੇਡਾ ਵੱਲੋਂ 2001 ‘ਚ ਅਤੇ ਹੋਰ ਬਹੁਤ ਸਾਰੀਆਂ ਸਾਹਿਤ ਸਭਾਵਾਂ ਵੱਲੋਂ ਬੇਹਤਰੀਨ ਲਿਖਤਾਂ ਕਰਕੇ ਸਨਮਾਨਿਆ ਗਿਆ।

ਸਰਦਾਰ ਪੰਛੀ: “…ਤੁਸੀਂ ਜਾਪਾਨ ਦੇ ਉਸ ਰੁੱਖ ਬਾਰੇ ਸੁਣਿਆ ਹੋਵੇਗਾ ਜੋ ਇੱਕੋ ਰਾਤ ਵਿੱਚ ਏਨਾ ਵੱਧ ਜਾਂਦਾ ਹੈ ਕਿ ਅਸੀਂ ਕਿਆਸ ਵੀ ਨਹੀਂ ਕਰ ਸਕਦੇ। ਇਸ ਰਫ਼ਤਾਰ ਨਾਲ਼ ਕੋਈ ਹੋਰ ਰੁੱਖ ਨਹੀਂ ਵੱਧਦਾ। ਗੁਰਦਰਸ਼ਨ ਬਾਦਲ ਨੇ ਵੀ ਪੰਜਾਬੀ ਗ਼ਜ਼ਲ ਦੇ ਬਾਗ ਵਿੱਚ ਜਾਪਾਨੀ ਰੁੱਖ ਦੀ ਵਧਣ-ਚਾਲ ਅਪਣਾ ਲਈ ਹੈ। ਨਵੀਆਂ- ਨਵੀਆਂ ਜ਼ਮੀਨਾਂ ਤਿਆਰ ਕਰਕੇ ਉਸਨੇ ਫ਼ਾਰਸੀ ਦੀਆਂ ਵੱਖ-ਵੱਖ ਬਹਿਰਾਂ ਤੇ ਤਬਾਅ ਅਜ਼ਮਾਈ ਕੀਤੀ ਹੈ।ਏਨੀਆਂ ਵੰਨ-ਸਵੰਨੀਆਂ ਬਹਿਰਾਂ ‘ਤੇ ਜ਼ਮੀਨਾਂ ਕਿਸੇ ਹੋਰ ਪੰਜਾਬੀ ਗ਼ਜ਼ਲਗੋ ਨੇ ਸ਼ਾਇਦ ਹੀ ਇਸਤੇਮਾਲ ਕੀਤੀਆਂ ਹੋਣ।”

“ਬਾਦਲਾ ! ਗਲ ਤੁਰੇਗੀ ਤਿਰੀ ਹਰ ਜਗ੍ਹਾ,
ਤੂੰ ਗਿਆ ਹੈਂ ਉਭਰ ਵੇਖਦੇ-ਵੇਖਦੇ।”

ਆਮੀਨ !!

Monday, August 6, 2007

ਇੱਕ ਵਿਛੋੜਾ ਹੀ ਨਹੀਂ...

No comments: